Bizi slavyan xalqları ilə tarixi, humanitar, mədəni, siyasi, iqtisadi, dostluq əlaqələri bağlayır. Əgər tərəflər böyük humanitar fəlakətə yol açmış bu müharibədən çıxmaq üçün Azərbaycanın vasitəçiliyini qəbul edərsə, Azərbaycan böyük məmnuniyyətlə bunu edər.

Axar.az xəbər verir ki, bu sözləri ƏHD Partiyasının sədri Qüdrət Həsənquliyev Azərbaycanın Rusiya və Ukrayna arasındakı müharibənin sülh yoluyla həllində vasitəçi kimi iştirak etməsi mümkünlüyü haqda suala cavabında deyib.

O bildirib ki, münaqişəyə və düşmənçiliyə son qoymaq üçün ədalətli sülhə nail olmaq gərəkdir:

“Bunun üçün ya tərəflər 1991-ci ilin sərhədləri çərçivəsində bir-birinin ərazi bütövlüyünü tanıyır, ya da ərazi mübadiləsinə gedirlər. Rusiyanın nəzarət etdiyi Krım və ona bitişik ərazilər Rusiyada qalır, həmin ölçüdə torpaqlar Kursk istiamətində Ukraynaya verilir. Ukrayna NATO-ya üzv olmaqdan və öz ərazisində xarici dövlətlərin hərbi bazasını yerləşdirməkdən imtina edir, tərəflər dostluq və əməkdaşlıq haqqında saziş imzalayırlar. Amma açıq söyləyim ki, indiki mərhələdə bu, az inandırıcı görünür. Çünki böyük güclər hələ ki, sülhdə maraqlı görünmürlər”.