BMT Baş Katibi Antonio Guterres İsrail və Qəzza zolağındakı silahlıları atəşkəsə riayət etməyə çağırıb və tərəflərin bu istiqamətdə atacaqları addımları alqışlayıb.
 
Ovqat.com-un məlumatına görə, Guterres münaqişənin 11-ci qanlı gününün arxada qaldığını xatırladıb və qurbanların ailələrinə və yaxınlarına başsağlığı verib.
 
Məlumata görə, İsraillə Fələstin arasında davam edən 11 günlük müharibə nəticəsində indiyədək Qəzzada 65-i azyaşlı olmaqla 232 fələstinli ölüb. Təxminən 2000-ə yaxın insan yaralanıb. İsrail tərəfində isə 12 nəfər ölüb, 50-dən çox insan yaralanıb. 
 
İsraillə Fələstin arasında atəşkəs əldə olunması üçün Misir və Qətərin vasitəçilik etdiyi bildirilir. İsrail tərəfi HƏMAS-la eyni masada oturmaq təklifindən imtina edib və danışıqları vasitəçilər üzərindən aparılmasına üstünlük verib. Bir çox müşahidəçilərə və siyasi liderlərə görə, bu, atəşkəs rejiminin qalıcılığını şübhə altında qoyur.