İsrail İran tərəfindən hər hansı birbaşa hücuma cavab olaraq bu ölkənin ərazisinə zərbə endirəcəyi barədə ABŞ və bir sıra Avropa ölkələrinə məlumat verib.

Oxu.Az xəbər verir ki, bu barədə İsrailin "Qaley SAXAL" ordu radiosu məlumat yayıb.

Qeyd olunur ki, bu xəbərdarlıqların məqsədi gözlənilən İran hücumundan dərhal sonrakı dövrdə beynəlxalq ictimaiyyətin İsrailə təzyiqini əvvəlcədən azaltmaqdır.

Bu xəbərdarlıqlar çərçivəsində İsrail tərəfi aydın şəkildə bildirir ki, hücumun nəticələri nə olursa-olsun, hətta İranın zərbəsinin nəticəsində heç bir itki olmasa belə, İsrail cavab olaraq İrana hücum etmək əzmindədir.

Qeyd edək ki, avqustun 12-də "Fox News" telekanalı mənbələrə istinadən İranın 24 saatdan az müddətdə İsrailə hücum edə biləcəyini iddia etmişdi.

Xatırladaq ki, Fələstinin radikal HƏMAS hərəkatının siyasi bürosunun sədri İsmayıl Haniyənin Tehranda ölümündən sonra Yaxın Şərqdə vəziyyət kəskin şəkildə pisləşib.