Sentyabrın 25-də Suriyanın şimalında müstəqil kürd dövlətinin yaradılması ilə bağlı referendumun keçirilməsi planlaşdırılır. Maraqlıdır, Türkiyə ilə sərhəddə müstəqil Kürdüstanın yaradılması qardaş dövlət üçün hər hansı təhlükə kəsb edirmi?

Moderator.az -a açıqlama verən millət vəkili Fazil Mustafa rəsmi Ankaranın bunun baş verməsini önləmək üçün ciddi addımlar atmalı olduğunu bildirdi:

"Faktiki olaraq Bərzaninin başçılığı ilə bir Kürdüstan dövləti yaradılıb. Söhbət Suriyanın şimalında ikinci bir Kürdüstan dövlətinin yaradılmasından gedir. İkincisini bufer dövlət kimi yaradırlar. Bu, bilavasitə ABŞ-ın dəstəyi ilə oyuncaq bir vasitə kimi nəzərdə tutulur. Bu, Türkiyə üçün böyük bir təhlükədir. Türkiyə bu dövlətin yaradılmaması üçün əlindən gələni etməlidir".