Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) 2020-ci ilin birinci yarısı üçün elan etdiyi müsabiqə çərçivəsində qəzetlərə maliyyə yardımının göstərilməsi ilə bağlı qərar qəbul edib. Prezidentin sabiq köməkçisi, bir vaxtlar dövlətin jurnalistlərə ayırdığı vəsaiti istədiyi adamlara peşkəş çəkən Əli Həsənovun Azərbaycan və rus dillərində çıxan “Kaspi” və “Kaspiy” qəzetlərinin adı isə həmin sıyahıda yoxdur. Zamanında dövlət dəstəyinin qaymağını yeyən, indisə ümumiyyətlə müftə yemdən uzaq saxlanılan hər iki qəzetin kollektivi öyrəşmədikləri diqqətsizliyə görə Prezident İlham Əliyevə müraciət ünvanlayıb.

Ovqat.com xəbər verir ki, müraciətdə niyə bu duruma düşdüklərinin səbəbini anlaya bilmədiklərini vurğulayan “Kaspi”çilər ölkə başçısından acizanə şəkildə pul istəyiblər. Özlərini “3 əsrin qəzeti”nin müdavimləri adlandıran “Kaspi” kollektivinin bu acizanə yalvarışı Əlahəzrət Tarixin ironiyası təsiri bağışladığından məktubu ən maraqlı tarixi sənəd nümunəsi kimi ədəbiləşdirmək qərarına gəldik. Buyurun, bu da Azərbaycan jurnalistika tarixinə Qəhqəhə nümunəsi kimi düşən həmin ironik sənəd:

Azərbaycan Respublikasının Prezidenti Cənab İlham Əliyevə

Hörmətli, cənab Prezident!

Azərbaycan Respublikasının Prezidenti yanında KİV-in İnkişafına Dövlət Dəstəyi Fondu 2020-ci ilin birinci yarısı üçün elan etdiyi müsabiqə çərçivəsində “Kaspi” qəzetinə maliyyə yardımının dayandırılması barədə qərar verib.

Biz bu qərarı çox təəccüb və təəssüf hissi ilə qarşıladıq. Axı niyə?

Hazırda “Kaspi” qəzeti ölkənin ən nüfuzlu çap nümunələrindəndir. Həm tirajına, həm məzmununa görə ölkədə çap olunan və Fondun maliyyə yardımı ayırdığı digər qəzetləri qabaqlayır.

1999-cu il martın 6-dan çapını bərpa edən qəzetin əsası 1881-ci ildə qoyulub. Ona görə də qəzeti “Üç əsrin qəzeti” adlandırırıq. Hazırda «Kaspi» gündəlik, rəngli formatda, həftəarası günlər 16 səhifə, şənbə günü isə 24 səhifə olmaqla nəşr edilir.

Azərbaycan dilində nəşr olunan “Kaspi” qəzetinin 26 nəfərdən ibarət kartla əmək haqqı alan kollektivi var. Bundan əlavə, qəzet 25-dək kənar müəlliflə qonorar əsasında əməkdaşlıq edir.

Qəzetin 3 əlavəsi fəaliyyətdədir. Həftənin cümə axşamı günləri “Teatr”, cümə günləri “Gənclik”, şənbə günləri isə “Ədəbiyyat” əlavələri nəşr olunmaqdadır.

Qəzetin 3 dildə – Azərbaycan, rus və ingilis dillərində fəaliyyət göstərən kaspi.az internet resursu da on-line fəaliyyət göstərməkdədir. Ayrıca ədəbiyyat və mədəniyyət xidmətləri üzrə ixtisaslaşmış artkaspi.az saytımız mövcuddur.

2019-cu ildə qəzet 3800 tirajla çıxıb.

Ötən illər ərzində ölkənin ən nüfuzlu qələm sahibləri “Kaspi”nin səhifələrində çap olunub.

Qəzet rəhbərliyinin təşəbbüsü ilə çoxsaylı layihələr icra olunub, “Kaspi” nəşrləri” silsiləsindən 20-dən artıq kitab çap edilib. “Kaspi”nin xətti ilə ötən əsrin əvvəllərində nəşr olunan Azərbaycan qəzetlərinin elektron arxivi Hollandiyadan alınaraq ölkəmizə gətirilib və Mirzə Fərəli Axundov adına Mərkəzi Kitabxanaya bağışlanılıb.

Qəzet fəaliyyətini bərpa etdiyi gündən daim dövlətçilik maraqlarını müdafiə edib, maarifçilik missiyasını daşıyıb.

Cənab Prezident!

Qəzetimizə hansı səbəbdən maliyyə yardımının ayrılmaması barədə bizə heç bir məlumat verilmir.

KİV DF-nin qəbul etdiyi qərar qəzetlə bu və ya digər formada əlaqədə olan 50 jurnalistin işsiz qalması deməkdir. 2020-ci il üçün qəzetin 3000-ə yaxın abunəsi vardır. Bu qərar bizi qəzetimizə abunə olanlar qarşısında da çətin durumda qoyur.

Kollektiv olaraq Sizdən xahiş edirik ki, belə bir tarixi xidmətləri olan qəzetin maliyyə yardımı ayrılan qəzetlərin siyahısına daxil edilməsinə yardımçı olasınız!

Dərin hörmətlə,

“Kaspi” qəzetinin kollektivi

Ovqat.com-dan xüsusi qeyd:

Bu yerdə şair-publisist Heydər Oğuzun Əli Həsənovun mətbuat siyasətinə həsr etdiyi “Sümsük it” şeiri yada düşür: