“Yezidi dəstəsi erməni qardaşlarının yanında olmaq üçün Qarabağa gedir”.
 
Ovqat.com xəbər verir ki, məlumatı Ermənistan İctimai Radiosu yayıb.
 
Məlumata görə, Ermənistanın Gənc Yezidilər Asosiyasiyasının sədri Said Avdalyan belə deyib.
 
“Tause Malak (Yezidilikdə tovuz quşu müqəddəs varlıq – mələk hesab edilir və bu cür adlanır) sizi qorusun”,- deyə Avdalyan yezidi gənclərə xeyir-dua verib.
 
Qeyd edək ki, yezidilər əsasən Şimali İraqda və Şimali Suriyada dağlıq ərazilərdə yaşayırlar və milli mənsubiyyət baxımdan kürdlərə yaxındırlar. Dini görüşləri atəşpərəstliyə bənzəyən yezidilər daha çox PKK-çıların sıralarında yer alırlar. Ermənistanda da kiçik qrup halında yaşayan yezidilərin Azərbaycana qarşı müharibəyə qoşulması bir müddət əvvəl Yaxın Şərqdəki PKK-çı terroristlərin Dağlıq Qarabağ münaqişəsinə cəlb olunduğu iddialarını gücləndirir.
 
Əslində yezidilərin dinində cihad anlayışı yoxdur və müharibəyə qatılmağa xoş baxılmır. Fəqət bir neçə il bundan əvvəl İŞİD İraqın və Suriyanın şimalını işğal edəndə yezidi kəndlərində qətliamlara başladı və bu topluluqda müsəlmanlara qarşı nifrət oyatdı. Yezidilər özlərini müdafiə etməyin ən qısa yolunu əllərinə silah alıb başqa qruplarla bir araya gəlməkdə gördülər. Yönəldikləri əsas qrup isə PKK-çılar oldu. Çünki kommunizm və ateizm düşüncəsini ideoloji hədəf kimi qəbul edən PKK-çılar dini ayrıseçkiliyə önəm vermir və yezidilərlə əməkdaşlığa maraq göstərirlər.
 
Maraqlıdır ki, İraqda İranın yardımı ilə qurulan Həşdi Şabi ordusu arasında yezidi batalyonları da yer alırdı. Yaxın Şərqdəki PKK-çı ünsürlərin İran vasitəsilə Ermənistan keçirilməsi xəbəri fonunda bu fakt da təsadüfi görünmür.