“Ölkəmizin rəhbərliyi bütün reallıqları anlayaraq, qonşu dövlətin ərazi bütövlüyünü tanıdığını bəyan edir. Düzünü desək, bu, məcburi addımdır. Bu, Ermənistanı indiki sərhədləri daxilində saxlamağa və müharibədən qaçmağa imkan verəcək. Etiraf edək ki, yeni müharibədə Azərbaycan-Türkiyə tandemi qarşısında müqavimət göstərməyə gücümüz çatmır”.

Ovqat.com xəbər verir ki, bunu erməni yazarı Romella Mnatsakanyan qələmə aldığı “Türkiyə və Azərbaycanla sülhün alternativi niyə yoxdur?” sərlövhəli məqaləsində bildirib.

Məqaləni olduğu kimi nəzərinizə çatdırırıq.

Ermənistan prezidenti Vaaqn Xaçaturyan Almaniya prezidenti Frank-Valter Ştaynmayerlə görüşündə deyib: "İrəvan ilkin şərt olmadan qonşuları ilə münasibətləri normallaşdırmağa hazırdır". Və bu, çox düzgün ifadədir.

Ştaynmayer isə öz növbəsində qeyd edib ki, Berlin İrəvanın regionda sülhə nail olmaq səylərini yüksək qiymətləndirir, həmçinin Ermənistanın Azərbaycanın ərazi bütövlüyünün tanınması ilə bağlı bəyanatına əhəmiyyət verir: “Bu, münasibətlərin normallaşması istiqamətində mühüm addımdır”. O, həmçinin qeyd edib ki, Almaniya Ermənistanla Türkiyə arasında münasibətlərin normallaşmasına töhfə verir.

Siz bu fikirlərlə razılaşmırsınızsa, Türkiyə və Azərbaycanla daha çox düşmənçiliyi təbliğ edən qüvvələrin ardınca gedə bilərsiniz. Bəs bu nəyə gətirib çıxaracaq? Türkiyə erməni soyqırımını tanıyacaqmı və təzminat ödəyəcəkmi, tarixi torpaqlarımızı qaytaracaqmı? Aydındır ki, bütün bunların heç biri olmayacaq. İndi Türkiyə çox güclüdür və açığı, ona xüsusi təzyiq yoxdur.

Azərbaycana gəlincə, biz görürük ki, ABŞ və Aİ-də ondan yalnız “Artsax” xalqının hüquqlarına hörmət etmək tələb olunur. Bakı isə bunu etməyə hazırdır; bu bölgəni özününkü adlandırır və “Artsax” erməniləri ilə bütün həmvətənləri ilə rəftar edəcəyinə söz verir. Vəssəlam. ABŞ və Aİ Azərbaycanın işinə yarayan sülh istəyir.

Ölkəmizin rəhbərliyi isə bütün bu reallıqları anlayaraq, qonşu dövlətin ərazi bütövlüyünü tanıdığını bəyan edir. Düzünü desək, bu, məcburi addımdır. Bu, Ermənistanı indiki sərhədləri daxilində saxlamağa və müharibədən qaçmağa şərait yaradır. Etiraf edək ki, yeni müharibədə Azərbaycan-Türkiyə tandemi qarşısında müqavimət göstərməyə gücümüz çatmır.

Dünyanın heç bir dövləti yeni müharibədə Ermənistanın tərəfində vuruşmağa hazır deyil. Təəssüf ki, biz ABŞ və Avropanın gözündə Ukrayna deyilik. Onlar üçün biz Rusiyanın mətanətli əlindən qurtulması vacib olan ölkəyik. Və burada Qərblə Azərbaycan və Ermənistanın planları üst-üstə düşür. Təbii ki, Rusiyanın özünə qarşı və o, artıq bütün cəbhələrdə məğlubiyyət yaşayır. İlk növbədə, döyüş meydanında. Ukrayna ordusu əks-hücum üçün tam hazır olmasa belə, o artıq 100 kvadrat kilometrdən çox ərazisini azad edib. Bundan əlavə, Rusiya Federasiyası üçün hər şey daha da pisləşəcək, çünki o, müasir silahlarla təchizi və müasir tipli müharibə aparmaq qabiliyyəti baxımından Ukraynaya və onun Qərb müttəfiqlərinə uduzur.

Üstəlik, Rusiya iqtisadiyyatı çökür və onun “tərəfdaşları” Kremldən üz döndərirlər. Məsələn, Serbiya Prezidenti Aleksandar Vuçiçin açıq şəkildə deyib: Serbiyada istehsal olunan silahların Ukraynaya satışına “bəli”, NATO ilə tərəfdaşlığa “bəli” və Qərbdən yan keçməkdə Rusiyaya qadağan olunmuş malların təkrar ixracı yolu ilə sanksiyalarına “bəli” ifadələrini yada salaq. 

Serbiya prezidenti açıq şəkildə etiraf edib ki, o, Moskva ilə Qərb dövlətləri arasında nazik bir xətt ilə hərəkət edir. Və buna görə də, Rusiyanın hərbi səylərinə kömək etməyəcəyinə, Serbiyanın BMT-nin bütün qətnamələrinə qoşulacağına, BMT-nin Rusiyanın Ukraynaya genişmiqyaslı işğalını pisləyən bəyanatlarını dəstəkləyəcəyinə eyham vurub.

Və sonra Çinin aktivlərinə görə üçüncü ən böyük bankı olan Bank of China (BoC) Rusiya müştəriləri üçün yuanla ödənişlərə məhdudiyyətlər tətbiq edib. Finam nümayəndəsi Dmitri Lesnovun RBC-yə verdiyi məlumata görə, iyunun 13-dən bank Bank of China-nın müxbir hesabları vasitəsilə təkcə yuanla deyil, həm də ABŞ dolları, avro və Honq Konq dolları ilə vəsait köçürməsini dayandırıb.

Modulbank İdarə Heyətinin sədri Pavel Semyonov nəşrə bildirib ki, məhdudiyyətlər yuanla köçürmələr üçün Bank of China-dan əsas müxbir bank kimi istifadə edən bütün banklara təsir edib. Ümumiyyətlə, tendensiya aydındır - Rusiyanın məğlubiyyəti hamı üçün aydın, aşkar bir gerçəkliyə çevrilir. Və bu şəraitdə axına qarşı deyil, onun axın istiqaməti üzrə üzmək lazımdır. Əks təqdirdə, daşlara çırpıla bilərik.

Tərcümə etdi: Ovqat.com