İyulun 30-da İsrailin “Haaretz” qəzeti Azərbaycanla bağlı yalan və böhtandan ibarət növbəti yazı dərc edib. Azərbaycan Prezidentinin xarici siyasət məsələləri üzrə köməkçisi Novruz Məmmədov AZƏRTAC-a bu yazı ilə bağlı münasibət bildirib. Prezidentin köməkçisi deyib:

“Təəssüf ki, məsuliyyət hissindən məhrum bəzi mətbuat orqanlarının təmsilçiləri vaxtaşırı yalan və böhtan xarakterli məlumatları yaymağı özlərinə peşə hesab edirlər.

İndiyə qədər İsrailin “Haaretz” qəzetində dəfələrlə Azərbaycan dövləti, onun xarici və daxili siyasəti ilə bağlı bəzi yalan məlumatlar dərc olunub. Lakin növbəti yalan və böhtan birbaşa Prezidentin ailəsinə qarşı yönəldiyindən ona münasibət bildirməyə ehtiyac var.

Belə ki, iyul ayının 30-da İsrailin “Haaretz” qəzetində Prezidentin ailəsi barədə bütövlükdə yalan məlumat, kiçik olsa da məkrli yazı dərc olunub. Əsas narahatlıq doğuran məqam isə bu məlumatda İsrailin turizm naziri Yarev Levinə istinad edilməsidir.

Yazıda göstərilir ki, guya son bir neçə ay ərzində Prezidentin ailəsi İsraildə əmlak almaqla, bu ölkəyə vəsait qoymaqla məşğul olub. Eyni zamanda, guya Prezidentin kiçik oğlu (fikir verin) bu aylarda İsraildə olub. Amma həqiqət budur ki, Prezidentin oğlu yalnız göstərilən aylarda yox, ümumiyyətlə, İsrailə səfər etməyib.

Bu informasiyalar yalan və böhtandan başqa bir şey deyil və onların reallıqla heç bir əlaqəsi yoxdur. İsrail mətbuatında belə yazıların dərci təəssüf doğurur və eyni zamanda, ölkələrimiz arasındakı münasibətlərin ruhuna da ziddir.

“Haaretz” qəzetinin jurnalisti məkrli niyyətini həyata keçirmək üçün İsrailin turizm naziri Yarev Levinə istinad edir. Hesab edirəm ki, yalan və böhtan məlumatla bağlı İsrail səfirliyi özünün və nazir Yarev Levinin mövqeyini bildirməlidir”.

Ovqat.com-un bildirdiyinə görə, qəzet Azərbaycan Prezidenti ailəsinin İsrail iqtisadiyyatına ümumilikdə 600 milyon dollar yatırdığını bildirmişdi. Sözsüz ki, ölkənin indiki iqtisadi böhran vəziyyətində dövlət rəhbəri iqtisadiyyatımıza xarici kapital cəlb etməyə çalışdığı bir zamanda yəhudi mətbuatının bu məlumatı inandırıcı görünmürdü. Xüsusilə cənab İlham Əliyevin rusiyalı həmkarıyla Soçu görüşündən bir müddət sonra bu cür təxribat xarakterli məlumatın yayılması da diqqətçəkici idi. Görünür, kimlərsə Azərbaycan-Rusiya münasibətlərinin normallaşmasını öz milli maraqlarına zərbə kimi qiymətləndirdiyindən bu dezinformasiyanı dövrəyə buraxıblar.

Bu mənada Azərbaycan rəsmilərinin yəhudi yalanını vaxtında təkzib etməsi təqdirəlayiq haldır və ümidvarıq ki, yersiz dedi-qodulara son qoyacaq.