Ukraynanı işğal əməliyyatına başlarkən Rusiya prezidenti Vladimir Putin qarşı tərəf qarşısında bir neçə ağır şərt qoymuşdu. Bir ay ərzində Ukraynada aldığı ağır zərbələrdən sonra həmin şərtlərin böyük əksəriyyətindən imtina edən Moskvanın hazırda yeganə şərti qalıb: Krımın Rusiya ərazisi kimi, Donbassın isə müstəqilliyinin tanınması. Müşahidəçilərin fikrincə, Ukraynada burnu əzilən Rusiya əslində həmin tələbləri müharibədən məğlub ayrılmadığını öz vətəndaşlarına göstərmək üçün irəli sürür. Ukrayna prezidenti Zelenski və onun beynəlxalq himayədarları isə Putinə bu “təvazökar” şansı da vermək istəmirlər. Zelenskinin həmin şərtlə bağlı dilə gətirdiyi fikirlər də bunu təsdiqləyir. O, danışıqlarda Krım və Donbass məsələsinin müzakirəsinə “yaşıl işıq” yandırsa da, bəzi imkansız şərtlər irəli sürüb: Danışıqlarda qəbul olunacaq bu qərar əvvəl Ukraynanın təhlükəsizlik qarantorlarının müzakirəsinə verilməli, onlar da bunu təsdiqləyərsə, xalqın seçiminə buraxılmalı və milli iradənin mövqeyini öyrənmək üçün referendum keçirilməlidir. 
 
Bu zamandək Ukraynanın qarantorları kimi çıxış edən 3 dövlət vardı – ABŞ, Türkiyə və Böyük Britaniya. Sözsüz ki, bu 3 dövlətdən ən azı 2-nin Krımın Rusiyaya verilməsi və Donbassın müstəqilliyinin tanınması şərti ilə razılaşmayacağı bəlli idi. Bu da azmış kimi, qarantor dövlətlərə bir də Kanada, Fransa, Almaniya, Çin, İtaliya, Polşa və İsrail əlavə olunaraq, məsələ daha da mürəkkəbləşdirilib. Zira zamin dövlətlərin çoxluğu Rusiyanın ərazi iddiaları məsələsində vahid mövqeyə gəlinməsini mümkünsüzləşdirəcək və müzakirələrin uzun müddət davam etməsinə şərait yaradacaq. Nəticədə çözümsüzlük dalanına dirənən Ukrayna böhranı Rusiyaya qarşı ağır sanksiyaların da davam etməsini şərtləndirəcək və mümkündür ki, proses bu ölkənin tam çöküşünə qədər uzansın. Qısası, konservləşdirilmiş Ukrayna problemi istənilən an partlamağa hazır vəziyyətə gətirilən barıt çəlləyinə çevrilib və Rusiyanın sanksiyalardan xilas olmaq üçün ortaya qoyacağı bütün səylərin üzərindən indidən xətt çəkir.
 
Ən əsası isə, 12 qarantor dövlət tərəfindən təsdiqlənən məsələ sonunda Ukrayna xalqının ixtiyarına veriləcək. Bir ay başına bombalar yağdırılan, minlərlə insan itkisi verən, evləri, şəhərləri darmadağın olunan Ukrayna xalqı, yəqin ki, Rusiyaya öz ağrısından başqa heç nə hədiyyə etməz. 
 
Əlbəttə ki, bunu Rusiya da bilir. Buna baxmayaraq, irəli sürdüyü bir çox tələblərdən imtina edərək, reallaşması mümkün olmayan bir şərt üzərində dayanmağa çalışır. Zənnimizcə, onun məqsədi həmin şərtin həyata keçirilməsindən çox, sadəcə sülh danışıqları bəhanəsi ilə müharibəni bitirməsidir. Çünki bu müharibənin Rusiyanı ancaq uçuruma sürüklədiyini indidən bəllidir. Fəqət müharibədən məğlub ayrılmaq da Moskva üçün böyük fəlakətin bağlanğıcı ola bilər.