“Tehran-Bakı münasibətləri müsbət qonşuluq əlaqələri məcrasında davam edir”.
 
Ovqat.com xəbər verir ki, İran Xarici İşlər naziri Hüseyn Əmir Abdullahyan bunu bildirib.
 
Nazirin sözlərinə görə bəzi məsələlərdə fikir ayrılıqları ola bilər, lakin mühüm olan odur ki, hər iki tərəf qarşıya çıxan maneələri dəf etmək üçün ciddi iradəyə malikdir. 
 
“Həmkarım cənab Ceyhun Bayramov və mən iki ölkə adından münasibətlərin hərtərəfli inkişafı və anlaşılmazlıqların aradan qaldırılması üçün müsbət əlaqələrimizi və məsləhətləşmələrimizi davam etdiririk . Bu kontekstdə biz ictimai və media məkanının daha yaxşı idarə olunması üçün ikitərəfli əməkdaşlığın artırılması və birgə komitənin formalaşdırılması barədə razılığa gəldik. Biz qonşularımızı özümüzə qohum hesab edirik və qohumluq münasibətlərini tənzimləyən prinsipləri yüksək qiymətləndiririk” –deyə nazir əlavə edib.