"AzPolitika.info" erməni mediasına istinadən xəbər verir ki, Ermənistanın Baş naziri Nikol Paşinyan bu gün - noyabrın 18-də hökumətin iclasında belə bir açıqlama ilə çıxış edib. O bəyan edib ki, Rusiyanın Müdafiə Nazirliyi delimitasiya və demarkasiyanın hazırlıq mərhələsi ilə bağlı təkliflər hazırlayıb. "Bu təkliflər Ermənistan üçün qəbulediləndir”, – Paşinyan vurğulayıb.

Paşinyan Müdafiə naziri Suren Papikyana göstəriş verib ki, Rusiya Müdafiə Nazirliyinin təkliflərinin detallarını aydınlaşdırsın. O, “gəlin, Rusiya Federasiyasının təklifləri çərçivəsində prosesi gerçəkləşdirməyə cəhd edək”, deyib, amma detalları açıqlamayıb.

Ermənistan Təhlükəsizlik Şurasının katibi Armen Qriqoryan noyabrın 17-də Moskvada rusiyalı həmkarı Nikolay Patruşevlə görüşüb. Patruşev Rusiyanın sərhədlərin müəyyənləşdirilməsinə müvafiq yardım göstərməyə hazır olduğunu deyib.

Son toqquşmalardan sonra Birləşmiş Ştatlar və Avropa Birliyi İrəvanla Bakını sərhəd demarkasiyası daxil vacib məsələlərin həllinə doğru işləməyə çağırıb.