Bu barədə hüquq müdafiəçisinin həyat yoldaşı Firuzə Gülalıyeva Amerikanın Səsinə bildirib.

Onun sözlərinə görə, İstanbulun “Avrasiya” klinikasında aparılan müalicə nəticə verməyib.

“Oqtay komadan ayılmayıb, vəziyyəti ağır və kritikdir. Amma, `Amerika xəstəxanası`nda daha ixtisalaşmış həkimlərin oluğunu bildirirlər. Ümid edirik ki, orada Oqtayın vəziyyətində dəyişiklik olar,” o bildirib.

Hüquq müdafiəçisi oktyabrın 29-da avtomobil vurduqdan sonra ağır kəllə-beyin travması alıb. Həkimlər beyinə qansızma diaqnozu qoyublar.

Oktyabrın 30-da o, beyindən gematomanın çıxarılması üzrə əməliyyat olunub.

Noyabrın 5-də birinci vitse-prezident Mehriban Əliyevanın tapşırığı ilə Heydər Əliyev Fondu hüquq müdafiəçisinin müalicəsi ilə bağlı məsələlərin həllini öz üzərinə götürüb.

Bundan sonra, Oqtay Gülalıyev noyabrın 6-da Bakıdan AZAL-ın xüsusi ambulans təyyarəsi ilə Türkiyəyə aparılıb və İstanbul Avrasiya Xəstəxanasına yerləşdirilib.

Oqtay Gülalıyevin oğlu Təbriz Gülalıyev Avrasiya xəstəxanasının həkimlərinin son rəyinə isitnadən bildirib ki, atasının komadan ayılması 6 aydan bir ilədək çəkə bilər.

“Həkimlərin bildirdiyinə görə, atanın beyın hüceyrələrindən üçü sıradan çıxıb. Bu o deməkdir ki, atam yaşadığı müddətdə hərəkət edə, danışa bilməyəcək. Ancaq reaksiyasız olaraq gözləri açıq olacaq,” Təbriz Gülalıyev qeyd edib.