Ötən il rayonun ağaclarını kəsməsiylə gündəmə gələn Sədərək rayonunun icra başçısı Həbib İbrahimov polis rəisini və öz müavinini qurban verməklə canını cəzadan qurtara bildi. Amma deyəsən, bu yüngül bədəl icra başçısını yeni qanunsuzluqlara həvəsləndirib. Necə olsa, keçmiş müavinini Mahir Vəliyev adlı birisi əvəz edib. Uzaq başı, bu dəfə də onu qurban verəcək, yerinə bir başqasını götürüb qaz vurub qazan doldurmağı sürdürəcək. Nə çoxdur Sədərəkdə könüllü günah keçiləri.


 
Ovqat.com-a Sədərəkdən göndərilən şikayət məktubundan belə anlaşılır.
 
Şikayətçinin bildirdiyinə görə, Sədərəkdə nəinki qanunların tələbləri, hətta Prezidentin Sərəncamları da keçmir. Burada keçən yalnız bir tələb var: İcra başçısının göstərişləri. Rayonun icra başçısı istəsə, Sədərəyin müəllimlərini, həkimlərini, istənilən dövlət idarəsinin müdirindən tutmuş kargüzarına qədər bütün işçilərini fəhlə və süpürgəçi kimi işlədər, heç kim də ona söz deyə bilməz. Nədən ki, Sədərək rayonunun bütün əhalisi onun dilsiz-ağızsız nökərləridir. Kimin həddi nədir, Sədərək “dərəbəyi”nin sözünün üstünə söz deyə.
 
Mətləbə az dəxli olan və şikayətçinin təhlükəsizliyini nəzərə alaraq etdiyimiz bəzi vacib ixtisarlarla, redaksiyamıza ünvanlanan məktubu diqqətinizə çatdırırıq.


 
“Salam, hər vaxtimiz xeyir. Mən sizi Naxçıvan MR Sədərək rayonundan narahat edirəm. Adım Züleyxadır (ad şərtidir). ... saylı məktəbdə müəllimə işləyirəm. 
 
Sizdən bir Azərbaycan qadını kimi xahış edirəm mənim bu şikayətimi işıqlandırın. 
 
Prezidentin Sərəncamına görə, ayın 9-dan 16-a kimi iş günü deyil. Buna baxmayaraq, Sədərək rayon İcra başçısı Həbib İbrahimov tətili ləğv edib, hər gün rayondakı bütün idarə və müəssisələri, o cümlədən xəstəxana və təhsil işçilərini, bir sözlə dövlət işində işləyənlərə iş günü elan edib. Bu işə nəzarəti isə özünün təyin etdiyi müavin əvəzi Mahir Vəliyevə tapşırıb. Mahir də hər gün idarə işçilərini iməcliye aparır. Camaatı qul kimi bu işlədirlər. Yolun kənarlarını otunu unversitet bitirmiş insanlara biçdirirlər. Həbib İbrahımov yol idarəsi, kommunal idarələrin “oklad”larini yediyi üçün onların islərini həftənin 6 günü idarə işçilərinə gördürür. 
 
Bundan əlavə, özü 100 hektar arpa, 50 hektar yonca əkib. Kanal su gəldikdə ancaq onun sahəsinə gedir. Kasıb camaatın isə əkini yanır. Çox-çox xahiş edirəm, köməklik göstərin, paylasinki bəlkə kimsə görə, bizi bu insafsızların əlindən qurtara”.