Ötən ilin payızında Azərbaycan Ermənistanla münaqişə zamanı Türkiyə PUA-ları və kamikadze-dronları sayəsində hava savaşını qazandı. O zaman ABŞ hərbi strateqləri üçün aydın oldu ki, indi düşməni izləmək və məhv etmək daha asandır və bu, daha ucuz başa gəlir.

Axar.az xəbər verir ki, bu fikirlər “Foreign Policy” jurnalındakı məqalədə yer alıb.

“Siz PUA-nın tankı, artilleriya mövqeyini, əsgəri necə məhv etməsilə bağlı videolara baxa bilərsiniz.

Ötən payız Azərbaycan Ermənistanı darmadağın etdi. Bundan başqa, müharibənin gedişi göstərdi ki, kasıb bir ölkə belə müxtəlif vasitələrdən və qoşun növlərindən istifadə edərək müharibə apara bilər. Sizin ABŞ və ya Rusiya olmağınız vacib deyil.

Müharibənin aparılmasının qiyməti, əvvəl hesablanandan daha azdır. ABŞ ordusunun gücünə bərabər qoşununuzun olması da vacib deyil”, - nəşr ABŞ ordusunun polkovniki Skot Şounun sözlərinə yer verib.