"Hökumətin uğursuzluğunu ört-basdır etmək uğursuz dövlətin göstəricilərindəndir".

Oxu.Az xəbər verir ki, bunu Azərbaycan Xarici İşlər Nazirliyinin Mətbuat Xidməti İdarəsinin rəisi Ayxan Hacızadə Fransanın Azərbaycandakı səfiri Ann Buayona cavabında deyib.

O qeyd edib ki, Fransanın xarici siyasətinin uğurlarının viza müraciətlərinin sayı ilə ölçülməsi, görünür, yeni üsuldur:

"Amma bu strategiyanın doğru faktları əks etdirməməsi yanlış təhlildən və səhv xarici siyasətdən xəbər verir. Xanım səfirə yaxşı məlumdur ki, Fransanın Bakıdakı səfirliyi yalnız Fransaya səfər üçün viza vermir".

A.Hacızadə vurğulayıb ki, real göstərici isə əslində, budur:

"Fransanın ölkəmizə qarşı qərəzli siyasətinə və bu ilin sentyabr ayından etibarən verilən səyahət xəbərdarlığına baxmayaraq, ölkəmizə səyahət üçün ötən ilin eyni dövrü ilə müqayisədə Fransa vətəndaşlarının müraciətləri daha da artıb. 2023-cü ilin sentyabrında 536, oktyabrında 467, 2024-cü ilin sentyabrında 562 nəfər, oktyabrında isə 605 nəfər olub".

Qeyd edək ki, Fransanın Azərbaycandakı səfiri Ann Buayon bu gün öz "X" hesabında paylaşım edərək bildirib ki, Azərbaycandan Fransa səfirliyinə bu il viza müraciətlərinin sayı artıb.